Tiranë, 14 Gusht 2025 – Kryeministri Edi Rama ka reaguar mëngjesin e sotëm përmes një postimi në Facebook, ku ka komentuar situatën e zjarreve që kanë përfshirë Shqipërinë dhe rajonin. Në mesazhin e tij, ai ka theksuar se situata është përmirësuar falë përpjekjeve dhe sakrificave të forcave zjarrfikëse, Forcave të Armatosura, policisë dhe vullnetarëve, por ka paralajmëruar se rreziqet dhe të papriturat mbeten të pranishme.
Kryeministri shprehu mirënjohje për angazhimin e strukturave shtetërore dhe vullnetarëve, ndërsa kritikoi ashpër disa zëra publikë që, sipas tij, shfrytëzojnë situatën për ekspozim mediatik. Ai gjithashtu vuri në dukje se zjarret janë një sfidë e përbashkët në gjithë Evropën Jugore, me mijëra vatra aktive nga Spanja deri në Turqi.
“MIRËMËNGJES dhe me një tjetër ditë gatishmërie të lartë e përpjekjesh të përbashkëta, përballë një situate të përmirësuar falë mundimesh e sakrificash të admirueshme por me rreziqe e të papritura në çdo çast; me neveri për lehaqeniet që vazhdojnë avazin e tyre të krehjes para pasqyrave mediatike, teksa në tërë Europën Jugore digjen në flakë mijëra vatra zjarri nga Spanja e deri në Turqi, ju uroj një ditë sa më të qetë të gjithëve,” shkroi Rama
Sipas raporteve, ditën e djeshme në Shqipëri u regjistruan 37 vatra zjarri në qarqe si Vlorë, Dibër, Berat, Tiranë, Gjirokastër, Elbasan, Shkodër, Kukës, Korçë dhe Lezhë.
Në terren janë angazhuar forca të shumta, përfshirë Shërbimin e Mbrojtjes nga Zjarri dhe Shpëtimit, Forcat e Armatosura dhe policinë, të mbështetura nga helikopterë dhe një avion zjarrfikës nga Italia.
Rama gjithashtu ka njoftuar se qeveria do të ofrojë një paketë mbështetëse për të adresuar dëmet e shkaktuara nga zjarret në bujqësi, banesa dhe nevoja të tjera të banorëve të prekur.
Ndërkohë, autoritetet kanë bërë thirrje për vigjilencë dhe bashkëpunim nga qytetarët për të parandaluar zjarre të reja, duke paralajmëruar masa të rrepta ndaj atyre që ndezin zjarre qëllimisht.
Situata mbetet delikate, dhe kryeministri ka theksuar nevojën për gatishmëri maksimale për të përballuar sfidat e vazhdueshme të kësaj krize.
