Ish-ministrit të Brendshëm Saimir Tahirit, iu lejua të kishte brenda qelisë në burgun 313, vetëm rroba dhe cigare. Gazetarja Klodiana Lala raporton se Tahiri ndodhet në godinën nr.2 të këtij institucioni të vuajtjes së dënimit, ndërsa është në observim.
Ish-ministri i Brendshëm, Saimir Tahiri u njoh ditën e djeshme me vendimin e formës së prerë nga Apeli i Gjykatës kundër Korrupsionit dhe Krimit të Organizuar, duke u dënuar me 5 vite burg për “shpërdorim detyre”, por për shkak përfitimit nga të gjykimit të shkurtuar do të vuaj 3.4 vite. Gjykata e Apelit la në fuqi vendimin e marrë në vitin 2019 nga Gjykata e atëhershme e Krimeve të Rënda, por me ndryshimin që dënimin ai do të duhet ta vuajë në burg dhe jo me shërbim prove. Mbrëmjen e kaluar, Tahiri e kaloi në burgun 313 në Tiranë, në godinën numër 2.
