Presidenti i Rusisë Vladimir Putin ka deklaruar se Moska do t’i arrijë qëllimet e saj ose përmes negociatave ose përmes luftës, që aktualisht vijon të mbahet e pushtuar Ukraina. Këtë qëndrim Putini e ka mbajtur gjatë telefonatës që ka pasur ditën e sotme me presidentin francez Emanuel Macron.
Në bisedën e tyre telefonike mësohet se Macron i ka kërkuar Putinit që t’i japë fund sulmit rus dhe të garantojë sigurinë bërthamore të Ukrainës pasi sulmet e shumta ndaj fabrikës bërthamore të Zaporizhzhia ka vendosur në rrezik të gjithë Evropën.
Nga ana e tij, Vladimir Putin mësohet t’i ketë thënë Macronit se Rusia nuk kërkon të sulmojë centralet bërthamore, por Moska do t’i arrijë qëllimet e saj përmes “negociatave ose luftës”. Po sipas Kremlinit, theksohet se Putini ka fajësuar ukrainasit për incidentin e centralit bërthamor, që sipas tij ishte një “provokim” i organizuar nga “radikalët ukrainas”. Nga ana tjetër, Ukraina ka fajësuar forcat ruse.
