Avokati Spartak Ngjela ka komentuar ligjin për hapjen e dosjeve të ndërmarrë nga maxhoranca në bashkëpunim me një pjesë të opozitës në seancën 20 tetorit në parlament.
I ftuar në emisionin Open në News 24, Ngjela tha se një nismë e tillë duhej të ishte ndërmarrë kohë më parë nga klasa politike.
Avokati deklaroi se dosjet nuk janë zhdukur dhe mendon se ato ruhen jashtë. Këtë gjë sipas tij ia ka rrëfyer Gramoz Pashko në vitin 1991, i cili i ka thënë se dosjet ua kishte kërkuar aleati i madh duke nënkuptuar SHBA-të.
Ai shkon dhe më tej kur thotë se ligji për hapjen e dosjeve mund të jetë kërkuar në këtë kohë po nga aleati që i mori dikur.
“Ligji ka dalë me dy të tretat e votave, pra është ligj kushtetues, dhe nuk flet dot kush kundër tij. Nëse është kurth, unë se kuptoj se ligji nuk ka emra. Përmirëson një ligj që nuk ka qenë i plotë, që është përdorur politikisht për diktaturë. Pasi i hoqi disa presidenti i 1992, i mori kukulla. Momentet kur dalin kukullat, vendoset diktaturë.
Mua më erdhi Pashkoja, zv/kryeministër në 1991, dhe tha që na kërkon ai aleati i madh dosjet e sigurimit, kështu që këta janë lodhur kot që kanë zhdukur dosjet, se ato janë andej, prandaj po vinë këtu. E vërteta nuk krijon kurth, por ka raste që nuk shprehet. Pra nëse nuk është e vërtetë fiton Meta, po është e vërtetë ikën Meta.
Firma është e pamundur të falsifikohet. Le të dalë ligji, kë kapi të ikë, por ajo që më ka bezdisur është që ka dalë vonë. Ne duhej t’i kishim mbyllur këto hesape. Pse rikthehet? S’ma ha mendja që të jetë vetëm kërkesë e politikës shqiptare. Mund të jetë e aleatit tonë, do të shikojmë si do venë çështjet, por që dosjet nuk janë zhdukur, ua thash, dhe kam përshtypjen që nuk janë sa i përket gjetjes së të vërtetës është në dorë të atij personi që do dalë që mund të ketë implikuar”, tha Ngjela.
