Presidenti i Rusisë, Vladimir Putin, ka shprehur gatishmërinë për të zhvilluar një takim me presidentin amerikan Donald Trump, në një vend neutral, duke përmendur konkretisht Emiratet e Bashkuara Arabe si një opsion të përshtatshëm.
“Ne kemi shumë miq të gatshëm të ndihmojnë në organizimin e një takimi të tillë. Njëri prej tyre është presidenti i Emirateve të Bashkuara Arabe. Mendoj se do të marrim një vendim së shpejti, dhe kjo mund të jetë një nga vendndodhjet më të përshtatshme”, u shpreh Putin gjatë një deklarate nga Kremlini.
Nga ana tjetër, i pyetur për mundësinë e një takimi me presidentin ukrainas Volodymyr Zelensky, Putin tha se nuk ka asgjë personale kundër tij, por theksoi se aktualisht nuk ekzistojnë kushtet e nevojshme për një dialog të tillë.
“Nuk kam asgjë kundër një takimi të mundshëm me Zelenskyn. Por, që të ndodhë, duhen krijuar kushtet e përshtatshme – dhe për momentin ato nuk ekzistojnë”, tha Putin, duke lënë të kuptohet se tensionet mes Moskës dhe Kievit mbeten një pengesë serioze për dialogun e drejtpërdrejtë.
Më herët të enjten, këshilltari i Kremlinit, Yuri Ushakov, bëri të ditur se Moska dhe Uashingtoni kanë rënë dakord për zhvillimin e një samiti mes liderëve të dy vendeve në ditët në vijim. Sipas tij, përgatitjet kanë nisur tashmë, me javën e ardhshme që shihet si periudha më e mundshme për zhvillimin e takimit, edhe pse afati përfundimtar ende nuk është përcaktuar.
Ndërkohë, i dërguari i posaçëm i Shtëpisë së Bardhë, Steven Witkoff, ka propozuar gjithashtu një takim të përbashkët trepalësh mes Putinit, Trumpit dhe Zelenskyt. Megjithatë, Kremlini nuk ka dhënë asnjë koment mbi këtë ide, sipas Ushakov.
