gazetar_agoranews Media amerikane ‘Boston Globe’ i ka kushtuar një shkrim rikthimit të çështjes së Gërdecit dhe ringritjes së akuzës ndaj ish-ministrit të Mbrojtjes Fatmir Mediu për shpërdorim detyre. Sipas gazetës amerikane, Mediu i shpëtoi dikur për shkak të imunitetit por tani do të përballet me akuzën për tragjedinë e Gërdecit të vitit 2008 ku humbën jetën 26 persona.
Prokurorët shqiptarë ngritën të enjten akuza kundër ish-ministrit të Mbrojtjes lidhur me shpërthimin masiv në fabrikën e demontimit të armëve në Gërdec në vitin 2008 që vrau 26 persona.
Struktura e Posaçme Kundër Korrupsionit, ose SPAK, e ngarkuar me hetimin e zyrtarëve të lartë, njoftoi se kishte akuzuar Fatmir Mediun, ministër i Mbrojtjes në vitet 2005-2008, për shpërdorim të detyrës.
E njëjta akuzë u hodh poshtë në vitin 2009 dhe Mediu i shpëtoi ndjekjes penale për shkak të imunitetit të tij si deputet i rizgjedhur në parlament.
Gjykata shqiptare vendosi në shtator të rihapë çështjen.
Mediu është ende deputet i një partie opozitare, por imuniteti parlamentar nga çështjet penale u hoq në vitin 2012. Mediu ka mohuar përfshirjen e tij në tragjedinë e Gërdecit duke e quajtur akuzën të motivuar politikisht.
Çështja rifilloi pas kërkesës së prindërve të djalit 6-vjeçar i cili u vra teksa luante në oborrin e shtëpisë së tyre në Gërdec, në shpërthimin e 15 marsit 2008.
Shpërthimi vrau 26 njerëz, u plagosën 264 dhe dëmtuan rreth 5500 shtëpi.
Në vitin 2012, një gjykatë dënoi dhe burgosi 19 persona për shpërthimin, por të afërmit e viktimave u ankuan të revoltuar se zyrtarë të lartë të qeverisë i ishin shmangur drejtësisë.
