gazetar_agoranews Pas fitores historike të Lëvizjes Vetëvendosje, kreu i LDK-së Isa Mustafa ka dhënë dorëheqjen.
Mustafa është shprehur para mediave se rezultati i zgjedhjeve ka qenë shumë i keq për LDK-në.
“Kishim mbledhjen e kryesisë që e thirra unë pas rezultateve të zgjedhjeve. Rezultati është shumë i keq për LDK-në, rezultat që ne nuk e kemi pritur fare as nga puna në teren e as nga puna që ka bërë kryeministri Avdullah Hoti. Qytetarët e thanë fjalën e tyre përmes votës dhe në shenjë të respektimit të kësaj vote, unë sot e kam njoftuar kryesinë se do ta thërras kuvendin e LDK-së për zgjedhjen e kryetarit të ri në një periudhë të shpejtë kohore me statut e kemi 60 ditë që ta bëjmë këtë mirëpo unë do ta bëjë më shpejtë këtë”, ka thënë Mustafa.
Mustafa sqaroi se bart përgjegjësinë si kryetar i LDK-së për atë se çfarë ka ndodhur në këto zgjedhje.
“Dua ta ruaj LDK-në dhe dua që LDK-ja të fuqizohet dhe të rikthehet si forcë e rëndësishme politike sepse i nevojitet Kosovës”, u shpreh Mustafa.
