gazetar_agoranews Në dëshminë e sotme përpara Komitetit të Marrëdhënieve me Jashtë në Dhomën e Përfaqësuesve të Kongresit, Sekretari i Shtetit Antony Blinken u pyet nga Kongresmeni Lee Zeldin në lidhje me shpalljen “non grata” të Sali Berishës dhe familjes së tij.
Lee Zeldin, anëtari i Dhomës së Përfaqësuesve nga Nju Jorku, i kërkoi Sekretarit Blinken të komentonte njoftimin e tij të muajit të shkuar për sanksionet ndaj ish-kryeministrit dhe ish-presidentit të Shqipërisë.
Blinken tha se Shtetet e Bashkuara vazhdojnë të monitorojnë ata individë “angazhohen në aktivitete korruptive, që cenojnë të drejtat e njeriut, ose që paraqesin sfida për demokracinë dhe principet demokratike.”
Referuar specifikisht rastit të zotit Berisha, Sekretari Blinken tha se çështja ndoqi procesin dhe kanalet e zakonshme ligjore dhe u shqyrtua me kujdes nga stafi ligjor i Departamentit të Shtetit. Sekretari Blinken e ftoi Kongresmenin Zeldin dhe të gjithë ligjvënësit e interesuar amerikanë për rastin e Sali Berishës t’i adresohen Zyrës së Çështjeve Legjislative.
Kongresmeni Zeldin e pyeti Sekretarin Blinken nëse kishte patur ndonjë komunikim me George Soros ose ndonjë tjetër individ të lidhur me të në lidhje me rastin e Sali Berishës. Sekretari Blinken u shpreh qartësisht se nuk kishte patur asnjë kontakt të tillë.
Dëshmia në Komitetin e Marrëdhënieve me Jashtë e Sekretarit Blinken është fokusuar në kërkesën e buxhetit të Presidentit Biden për Departamentin e Shtetit në vitin e ardhshëm dhe për prioritetet e politikës së jashtme në vitin 2022./ArberiaNews.net
