gazetar_agoranews Kreu i Partisë Demokratike, Lulzim Basha ka deklaruar hapur në mbledhjen e grupit parlamentar demokrat se prej nga erdhi kërkesa për përjashtimin e Sali Berishës nga PD-ja.
Sipas Bashës, kërkesa erdhi nga kupola dhe zyrtarë të lartë të SHBA-ve dhe informacionet për këtë fakt i di vetëm ai dhe Berisha. Basha shtoi se nuk do të lejojë që në PD të krijohen grupe apo deputetë që dalin kundër amerikanëve. Ai i ka cilësuar amerikanët si partner strategjik të PD-së dhe sipas tij ky partneritet do të vazhdojë mes partisë që ai drejton dhe SHBA.
“Mos thoni gjysmë te vërteta. Kurrë nuk kam deklaruar se ky ka qenë vendimi i jetës sime, por ka qenë më i vështiri. Nuk desha që këtë vendim t’ua lija forumeve të PD-së për të mbajtur të bashkuar partinë. Në PD, nuk do të lejoj dhe nuk do të ketë grupime kundër amerikane. Ky është vendimi në interes të demokrateve. Vendimi për Sali Berishën nuk ka më kthim pas. Pastaj ka një keqlexim që bëhet ose interpretohet në media. Doktori nuk është përjashtuar përfundimisht, nuk është linçuar. Ndaj tij janë thënë fjalët më të mira. Por siç ka deklaruar edhe vete ai do të ndjek procesin gjyqësor. Dhe derisa e vërteta të dalë në shesh do të qëndroj jashtë grupit. Ai nuk është përjashtuar as nga strukturat qe te ishte nevoja për mbledhjen organeve të PD kërkesa për doktorin nuk ka ardhur nga zyrtarë të nivelit të tretë apo të rangut te ulët. Ka ardhur nga kupola e shtetit amerikan. Informacionet i di unë siç i di shumë mirë edhe doktori dhe që ju s’keni për t’i marrë vesh kurrë. Vendimi nuk ka me kthim pas. Nuk mblidhet asnjë Kryesi apo Kuvend sepse s’mund të ketë kuvend antiamerikan”, është përgjigjur kryedemokrati Basha.
